संजु कर्ण, जेठ ४ गते । नेकपा एमाले सर्लाहीको अध्यक्षमा राजनारायण साह निर्वाचित भएको छ । निकटतम प्रतिस्पर्धी गणेशप्रसाद प्रसाईलाई १२ मतको झिनो अन्तरले पराजित गर्दै साह अध्यक्षमा चुनिएको हो ।
साह २८० मतसहित अध्यक्षमा निर्वाचित हुँदा प्रसाईले २६८ मत प्राप्त गरेको छ । अध्यक्षका अर्का उम्मेदवार जयप्रकाश यादवले भने २० मत प्राप्त गरेको छ । नेकपा एमाले फुटेर नेकपा एकीकृत समाजवादी पार्टी गठन भएपछि तत्कालिन जिल्ला अध्यक्ष रेवती पन्त त्यसबेला समाजवादीतर्फ लागेपछि साह एमालेको जिल्ला अध्यक्षमा मनोनित भएको थियो । अहिले नवौंऔँ जिल्ला अधिवेशनबाट साह नै अध्यक्षमा निर्वाचित भएको छ । त्यस्तै उपाध्यक्ष, सचिव र दुई जना उपसचिवमा पनि साह प्यानलकै नेता बिजयी भएका छन् ।
उपाध्यक्षमा २६२ मत प्राप्त गरी विदुरकुमार प्याकुरेल निर्वाचित भएको छ । प्याकुरेलका प्रतिस्पर्धी पार्वती विश्वकर्माले १७१ र प्रकाश थापाले १२१ मत प्राप्त गरेको छ । सचिवमा १७७ मतसहित डिल्लीप्रसाद अधिकारी निर्वाचित हुँदा उनका प्रतिस्पर्धीहरु बलराम पोखरेलले १३९, सुनील श्रेष्ठले १३१ र चूडामणि वाग्लेले ८६ मत प्राप्त गरेको छ । उपसचिव खुल्लामा बलराम यस्माली मगर २१७ मत प्राप्त गरी निर्वाचित भएको छ । यस्मालीका प्रतिस्पर्धीहरु मोहन भण्डारीले १०२, अजयकुमार सिंहले १०१, सन्तोष आचार्यले ७१, लक्ष्मण साह कलवारले १८ र सन्जीव कुमार सिंहले १७ मत प्राप्त गरेको छ । उपसचिव महिलातर्फ पाँच मतको अन्तरले विभा नेपाल निर्वाचित भएकी छन् । नेपाल २६३ मतका साथ महिला उपसचिवमा निर्वाचित हुँदा उनकी प्रतिस्पर्धी एकावतीदेवी चौधरीले २५८ मत प्राप्त गरेकी छन् ।