सन्जु कर्ण, सर्लाही,
सर्लाही, माघ ३ गते । सर्लाहीको हरिवनमा माघ ५ गते देखि ७ गते सम्म चल्ने दोस्रो डेरी कृषि अनुसन्धान उत्पादन तथा कृषि औजार प्रदर्शनी महोत्सवका लागि धमाधम काम भइरहेको छ । मधेश प्रदेशको सान, दुग्ध र कृषि क्षेत्र हामी सबैको पहिचान’ भन्ने मूल नाराका साथ दोस्रो डेरी कृषि अनुसन्धान उत्पादन तथा कृषि औजारको प्रदर्शनी महोत्सव काम तीब्र रुपमा भइरहेको आयोजकले बताएको छ ।
तीन दिनसम्म चल्ने महोत्सवको हरिवन नगरपालिका, प्रदेश दुग्ध बिकास बोर्ड मधेश प्रदेश, र कृषि अनुसन्धान निर्देशनालय मधेश प्रदेश संघिय कार्यालय परवानीपुर बारा मुख्य आयोजक रहेका छन् भने कृषि ज्ञान केन्द्र सर्लाही, इन्दुशंकर चिनी उधोग हरिवन, हेल्भेटास नेपाल, हेफरइन्टरनेशनल सह–आयोजक रहेका छन् ।
कृषि पेशाको बिकास प्रवद्र्धन बजारीकरण र यान्त्रीकरण मार्फत कृषि उत्पादनमा वृद्धि बिकास गर्ने र मधेश प्रदेशलाइ कृषकको पहिचान बनाइ मधेशका किसानलाइ आफैमा आत्मनिर्भर कसरी बनाउन सकिन्छ भन्ने उदेश्यले प्रदर्शनीको आयोजना गर्न लागिएको महोत्सव मुल आयोजक समितीका संयोजक केशवराज थापाले जानकारी दिए । तीन दिनसम्म चल्ने प्रदर्शनी महोत्सवमा मधेश प्रदेश भित्रका किसानले उत्पादन गरेका कृषि उत्पादनका साथै दुग्ध जन्य पदार्थ र कृषि यान्त्रीकरण सामाग्री लगायतको स्टल राखिने कृषि पेशाप्रती आकर्षित गराउन उत्कृष्ट किसानलाइ पुरस्कारबाट सम्मानीत गर्ने, पशु उपचार, माटो, गोबर परिक्षण गर्ने ब्यवस्था मिलाइएको आयोजकले जनाएको छ । महोत्सवमा अवलोकन गर्न आएकाहरुको मनेरञ्जनका लागि स्थानीय कला संस्कृती झल्कीने सांस्कृतिक कार्यक्रमसमेत रहने बताएको छ ।

महोत्सवमा स्टल राख्न चाहनेको लागि निःशुल्क स्टलको ब्यवस्था गरिएको आयोजकले बताएको छ । महोत्सव सम्पन्न गर्नका लागि करिव २६ लाख रुपियाँ लाग्ने अनुमान गरिएको हरिवन वडानम्बर–३ का वडा अध्यक्ष समेत रहेका महोत्सव आर्थिक समितीका संयोजक दिपमान लोप्चनले जानकारी दिए । उनका अनुसार तीन दिनसम्म चल्ने महोत्सवमा ३० हजार बढीले अवलोकन गर्ने अपेक्षा राखेको बताए । हरिवन नगरपालिकालगायत बिभिन्न संघ संस्थाबाट आर्थिक सहयोग संकलन गरिएको महोत्सव आर्थिक संयोजक लोप्चनले जानकारी दिए ।
दोस्रो डेरी कृषि अनुसन्धान उत्पादन तथा कृषि औजार प्रदर्शनी महोत्सव हरिवनमा गत बर्षबाट सुरु भएको हो । यो महोत्सव प्रत्येक बर्ष सञ्चालन गर्दै जाने हरिवन नगरपालिकाले जनाएको छ ।